حريق بمخزن أدوات بلاستك فى المنوفية
هاجر عبد العليم نشب منذ قليل حريق بمخزن أدوات بلاستك بإحدى قرى مركز قويسنا بمحافظة المنوفية ، وانتقلت قوات قوات الحماية وجارى عملية الإطفاء ، وجارى تحرير محضر بالواقعة وأخطرت…
كتبت هاجر عبد العليم
أدلت “رانيا . ص” مذيعة، المتهمة بقتل زوج شقيقتها الذي وشى بزوجها لبعض الدائنين في منطقة السيدة زينب، أمام نيابة حوادث جنوب القاهرة الكلية، باعترافات تفصيلية، كما تسلمت النيابة تقرير الصفة التشريحية للمجنى عليه تمهيد للانتهاء من التحقيقات وإحالتها للمحاكمة.
وقالت المتهمة، إنها اصطحبت زوجها “عبدالرحمن . خ” يوم الواقعة للاطمئنان على والدها وأمها لمرورهم بظروفة صحية سيئة، لافتة إلى أن زوجها دخل في شراكة مع شخص اسمه كريم من السيدة زينب لفتح مشروع ملابس، وأوضحت: قام كريم بدفع 300 ألف جنيه لزوجى، لكن المشروع لم ينجح ودفع زوجى لكريم نصف المبلغ وبعد ازمة كورونا ساءت الأمور الاقتصادية ولم يستطع زوجى دفع باقى المبلغ وأخبر كريم بمنحه قطعة أرض في الفيوم لعدم وجود سيولة، لكنه رفض وطالبه بسداد باقى المبلغ نقديا، ومن وقتها بدأ كريم في البحث عن زوجى.
وأضافت: “كريم ده خالته اسمها مها، كانت بتتعامل معايا على أساس تجيب لي شغالات، وأخدت كريم وراحت عند أحمد جوز أختي مرام، وطلبت منه إنه يقول مكان جوزي فين، وامبارح كان أبويا وأمي تعبانين فروحت أنا وجوزي عشان نطمئن عليه، كان هناك أختي سعاد وجوزها وأختي التانية مرام، وكنا عاوزين نجيب ليهم دكتور فجوزي اتصل بدكتور يعرفه وجه يكشف عليهم، وبعد مكشف نزلت أنا وجوزي عشان نحاسبه، وعشان نجيب أكل من محل شاورما من قدام البيت”.
واستكملت : “فوجئت بخالة كريم معاها حوالي 4 رجالة زقوني وراحوا واخدين عبدالرحمن جوزي، وركبوا توك توك واختفوا، ناس قالت لي ركبوا تاكسي واختفوا، قالولي كده، روحت طالعة فوق لقيت أحمد جوز أختي مرام كان قاعد علي كرسي قدام الباب فروحت ضربته في صدره، وقولت له عملك إيه عشان تسلمه، هو جاي وقف معانا وجبلنا دكتور ودفع ليهم فلوس، راح شدني ودخلني جوا الأوضة وهدومي انقطعت وحاول يضربني بكرسي كان جنبه، أنا كنت واقفه جنب سفرة عليها سكينة فاكهة فروحت وخداها ضربته بيها في رجله شمال هو نزف دم كتير، حالة انهيار جات لي حاولت أكلم النجدة أكتر من مرة معرفتش أوصل لحد، وهما كلموا الإسعاف ياخدوه، وأنا كنت مش في الوعي لحد شرطة ما خدتني وجابوني على القسم”.
وأكملت: “موضوع شركة بين جوزي وكريم من حوالي سنتين والقعدة اللي قعدتها الست اسمها مها مع أحمد جوز أختي من شهرين وخطفوا جوزي، وأنا اتخانقت مع أحمد جوز اختي في 12-4-2021 حوالي ساعة 2 و30 دقيقة صباحًا في بيت والدي في 229 شارع بورسعيد السيدة زينب، والمجني عليه بلغ عن جوزي لأن إحنا عرفنا قبل كده إن كريم وهي قعدوا معاه، وطلبوا منه إن يقولهم علي مكان جوزي مقابل مكافأة فلوس”.
قالت المتهمة إنها لم تقصد قتل المجني عليه، لكنها تشاجرت معه في منزل والدتها في السيدة زينب وعاتبته على الإبلاغ عن زوجها لأحد الدائنين والإرشاد عن مكانه، وتطور الأمر لمشاجرة فتوجهت للمطبخ وحصلت على سكين، ووجهت طعنات تجاه جسده، ما أسفر عن مقتله في الحال.
كانت النيابة قد قررت حبس المتهمة أربعة أيام على ذمة التحقيقات، وتوجيه تهمة القتل العمد لها، والتحفظ على سلاح الجريمة.
كانت قوة من قسم شرطة السيدة زينب بالقاهرة، ألقت القبض على مذيعة بالراديو لاتهامها بقتل زوج شقيقتها بسلاح أبيض، لإبلاغه عن زوجها الذي يختبأ بأحد الأماكن السرية، ومتهم بالتهرب من دفع ديون مستحقة لعدد من الأشخاص.
وألقى رجال الشرطة القبض على المتهمة في حالة تلبس، وفي يديها السلاح المستخدم في الجريمة؛ إذ اعترفت تفصيليًا بالواقعة وإقدامها على طعن المجني عليه عدة مرات، ليتم نقل جثة المجني عليه إلى مشرحة زينهم، للوقوف على أسباب الوفاة وتحرر المحضر اللازم، وجارٍ اتخاذ الإجراءات القانونية اللازمة حيالها، وأخطرت النيابة العامة التي تباشر التحقيق في الواقعة.
