إنجاز رياضي مصري عالمي جديد اتحقق على الأراضي الأسبانية بتوقيع مجموعة من أبطالنا رجال الشرطة المصرية!.. إيه الحكاية؟..

 

مصطفى محمد

الحكاية إن من بداية شهر نوفمبر انطلقت منافسات بطولة العالم لكمال الأجسام بمشاركة 4500 لاعب بيمثلوا 80 دولة واللي شارك فيها بعثة المنتخب القومي اللي بيضم بين صفوفه مجموعة من أبطال الشرطة اللي قدروا يحققوا 3 ميداليات ذهبية وميدالية فضية وميدالية برونزية..

 

من اللحظة الأولى كان واضح لكل اللي بيتابع البطولة إن أعضاء منتخبنا جاهزين وعلى أتم الاستعداد للبطولة.. لياقة.. تركيز..تصميم على تحقيق النجاح، وده اللي حصل فعلاً..

أبطالنا هما العميد “أحمد سامى أحمد السيد” مدير إدارة التدريب في الإدارة العامة لاتحاد الشرطة الرياضي وحصل على المركز الأول في بطولات الكلاسيك فيزيك أساتذة الميدالية الذهبية، والكلاسيك فيزيك رجال الميدالية الذهبية، والميدالية الذهبية للقب بطل أبطال العالم في فئته..

 

أمين الشرطة “محمد عبدالمحسن حسن نوفل” حصل على المركز الثالث والميدالية البرونزية في كمال الأجسام للأساتذة، والموظف المدني “السيد السيد محمود السيد” وحصل على المركز الثاني والميدالية الفضية في كمال الأجسام للأساتذة وكلهم ممثلين نادي اتحاد الشرطة الرياضي..

 

الأبطال وصلوا لأرض مصر بالسلامة بعد الإنجاز اللي حققوه وكان في استقبالهم في المطار وفد من وزارة الداخلية وكرموهم على مجهودهم وتشريفهم لبلدهم في المحفل الرياضي المهم ده..

 

أهمية الإنجاز اللي اتحقق ده إنه بيخليك تشوف اهتمام وزارة الداخلية بالرياضة باعتبارها عنصر أساسي وجوهري في عمليات الإعداد البدني والذهني والنفسي لرجال الشرطة.. السياسات الأمنية في كل مكان في العالم بتعتمد دلوقتي على تنمية المهارات الرياضية والبدنية للعنصر البشري وده اللي بدوره بيرتقي بالأداء والكفاءة في تنفيذ المهام، وده برضه اللي بتنفذه الداخلية المصرية بمنتهى الجودة من خلال توفير البيئة المناسبة لأبناءها وتشجيع الموهوبين منهم في كل الألعاب الرياضية وبالتالي حصد البطولات في كل المحافل الرياضية المحلية والإقليمية والدولية..

 

نجاح جديد اتكتب بحروف من نور باسم مصر في عالم الرياضة وبتوقيع 3 أبطال من رجال الشرطة المصرية.