مصطفى محمد
مواطن بسيط مقيم في دائرة شرطة قطور في محافظة الغربية عنده ظروف صحية خاصة صعبة شوية وبسببها مش بيقدر يتحرك وكل اللي كان محتاجه كرسي متحرك يسهل عليه الدنيا شوية.. قرر يبعت التماس لوزارة الداخلية يقول لهم فيه على مشكلته وطلبه ده!.. طب ليه مابعتش لوزارة الصحة أو لأى جهة حكومية تانية زى مجلس الوزراء مثلاً على الأقل ده هيكون تخصصهم أكتر من الداخلية؟.. محدش عارف بس ممكن يكون فعلاً بعت التماسه لكذا جهة ومنهم الداخلية..
العظيم في الموضوع إن وزارة الداخلية وبمجرد ما وصل الالتماس ليهم بعتوا مأمورية من ضباط وضابطات مديرية أمن الغربية لحد بيت المواطن ومعاهم كرسي متحرك هدية!.. سرعة الإستجابة اللي حصلت من الداخلية بتأكد استراتيجية الوزارة الهادفة في تعظيم الدور الإنساني والمجتمعي لهيئة الشرطة مع كل شرائح المجتمع.. اللي هو إحنا مالناش دعوة وده مش تخصصنا!.. لأ.. مادمنا نقدر نساعد مواطن مصري بأى حاجة هنعمل كده فوراً وبدون تردد ولا حسابات، وده حق المصريين علينا.. تصرف مُلهم ومحترم من وزارة كسبت محبة وتقدير كل المصريين.
