كلب مذيعة شهيرة يهاجم جارها ليدخل فى غيبوبة (القصة الكاملة)

كتبت ايمان محمد
هاجم كلب “بيتبول” تملكه مقدمة برامج الطبخ أميرة شنب، جارها الشاب محمد محب محدثًا به إصابات بالغة أدخلته فى غيبوبة يرقد على إثرها فى المستشفى.

الحادث أثار غضب رواد مواقع التواصل الاجتماعى الذين طالبوا بحق محمد تحت هاشتاج حق محمد محب فين.

وكتب محمود الشافعى، عبر حسابه بموقع التواصل الاجتماعى “فيسبوك”: “يا جماعه امبارح كنت فى مستشفى دار الفؤاد فى أكتوبر بزور واحد من أعز أصحابى فى رحلة الحياة..

“محمد محب” من أنقى وأجمل الشخصيات اللي ممكن تقابلها فى حياتك.. مدير ناجح فى بنك عالمى وأب لولد وبنت زى القمر وساكن فى كومباوند محترم فى أكتوبر وهو فعلا ليه نصيب كبير قوى من اسمه سبحان الله..
“محب” ده فعلا اسم على مسمى..

المهم حظه إنه ساكن تحته مذيعة مشهورة عندها كلب “بيتبول” ضخم العضلات من المحظور استيرادهم دوليا.. وبالرغم إن هو “محب” للحيوانات فعلا إلا إن الكلب ده كان دايما يهاجمه فى الطلعة والنزلة وكان دايما يحكيلى إنه صعبان عليه جدا إنه مش واخد عناية كافية فى تحسين السلوك وبيهاجم كل اللي يشوفه!!

يوم الأحد اللى فات قرر “محب” إنه يخبط على باب الجيران اللى تحته عشان يطلب منهم يسيطروا شوية على كلبهم بدل ما هو عمال يهاجمهم كده من ورا السور القصير اللى عادى جدا انه ينط من فوقيه!!

فتحت له الشغاله باب الشقة..
وقبل ما يفتح بقه بكلمة واحدة.. خرج الكلب المفترس ده من وراها وهجم على صاحبى فى مدخل العمارة اللى كان واقف فيه ابنه “على”، حاول إنه يفدى ابنه.. الكلب حرفياً قام بافتراسه بدون مبالغة..

عض في الذراع والفخذ وأماكن متفرقة فى الجسم نتج عنها قطع نافذ فة الأوتار والأعصاب، وفجأه المدخل كله دم

جحيم يحدث أمام ابنه الوحيد ولا منقذ لهذا الأب من فك القاتل المفترس الذى تمتلكه هذه المذيعه الغائبة عن المشهد.

لقد كاد أن يقضى عليه هذا “الحيوان” الطليق أمام ابنه الوحيد فى مشهد لن يمحى أبدا من ذاكرة الابن على ما اعتقد!

بالعناية الإلهية فقط استطاعوا أن يفلتوه من بين أسنانه وتوجهوا به لمستشفى “دار الفؤاد” بحكم أنها أقرب مستشفى كبير لهم..

بعد الفحوصات أكدوا أنه سيحتاج لعملية نقل “أعصاب” من القدم إلى هذة الذراع التى تم تمزيقها، وبعد إجراء الفحص الطبى المطلوب دخل محمد غرفة العمليات وفور اعطاؤه حقنة التخدير.
توقف قلب أعز أصدقائى لمدة 30 دقيقة تقريباً.

ارتبك الجميع وعلى الفور تم إعطاؤه صدمات للقلب ونقله للرعاية المركزة، وتم تأجيل هذه العمليه لأجل غير مسمي حتي يعود مرة اخرى للحياة!