وسط غياب الاعلام : نشطاء يكشفون ” ممر التنمية ؛ من فكر وحلم الباز لإرادة وتنفيذ الدولة المصرية رغم التحديات ” .
- الإعلانات -
تقرير : أصالة وطن .
وسط غياب أعلام حقيقي وصحافة حقيقيه تقف الى جانب الدولة المصريه بنظره عقلانيه وموضوعية وتقديم حلول لمواجهه التحديات ، في ظل هذا الإخفاق الصحفي والاعلامي والذي قد يكون مقصودا او غير مقصود وفي الحاله الاخيره يكشف عن افتقار الإعلام والصحافة المصريه للوعي اصلا خاصه بما تواجهه الدولة من تحديات لعرقلة مسيرتها في كافة الاتجاهات ؛ في ظل هذا برز دور نشطاء التواصل الاجتماعي في كشف إنجازات الدوله المصريه حيث اهتمت صفحة خاص من مصر بالكشف عن المشروع القومي المصري العملاق ممر التنمية ،وإيمانا من مسئوليه اصاله وطن ننشر التقرير ، وبعض تعليقات المتابعين على اختلاف آرائهم ، فيما يلي :
دايما كنا نسمع عن دكتور فاروق الباز و فكرته لتعمير الصحراء الغربية بمشروعه الطموح “ممر التنمية Path of development”
لو مكنتش سمعت بيه خليني اديلك نبذة صغيرة عنه الراجل الباز ده عالم جيولوجي مصري بيشتغل انهاردة في وكالة ناسا ضمن مشروع استكشاف سطح القمر جه من ٣٠ سنة وقال يا جماعة احنا لازم نخرج من الوادي الضيق فكرة ان المصريين يعيشوا تاني حوالين ضفاف النهر دي بقت مستحيلة كانت تنفع زمان ايام ما كنا ملايين تتعد على الصوابع لكن انهاردة ضروري نخرج نعمر الصحراء .
كلام يمكن يكون مكرر ناس كتير بيقولوه بس بيفضل اللي بيقولوه مجرد كلام لكن دكتور الباز كان مختلف عنهم لانه قدم مخطط تنموي شامل لخطة “خروج المصري من الوادي الى الصحراء” شرح فيها للحكومة المصرية ايه اللي ممكن تعمله عشان تشجع المصري انه يخرج برا الوادي الضيق و يعمر الصحراء مخطط دكتور فاروق كان مكلف جدا في وقت الدولة المصرية مكنتش عندها لا القدرة المادية و لا الفنية انها تبدأ في تنفيذه
في ٢٠١٥ عينه الرئيس في منصب مستشار الرئيس للشئون العلمية في نفس الوقت اللي كانت بتخرج فيه مخططات ممر التنمية و التعمير من الأدراج للبدء فورًا في تنفيذها
العمود الفقري للمشروع اللي قدمه دكتور الباز كان طريق حر بمواصفات عالمية يربط بين الاسكندرية و أسوان و قطار سريع موازي للطريق و على ضفافهم يتنفذ مشاريع تنموية عملاقة سكنية و زراعية و صناعية و سياحية و تجارية
بدأت وزارة النقل تنفيذ الطريق الجديد “الصحراوي الغربي” بطول ١١٥٥ كم تم تزويده بحارات للنقل الثقيل و دي حارات خرسانية اتنفذت بماكينات ألمانية من شركة writgen و ده تاني طريق في مصر يتنفذ بالطريقة دي بعد طريق السويس و كمان هيتم ادارة الطريق بنظام ITS الفرنسي وده نظام الغرض منه إحكام قبضة وزارة النقل على الطريق الجديد من خلال تركيب رادارات فرنسية ذكية و تركيب شاشات تفاعلية بيتعرض عليها الوقت و درجة الحرارة و حالة المناخ التنبؤية و تحصيل رسوم العبور إلكترونيًا و ربط الطريق بنقاط الاسعاف لسرعة التدخل
في نفس الوقت كانت الوزارة بتعرض خطتها لإنشاء شبكة قطارات سريعة على الشركات العالمية اتقدم لتنفيذها شركات صينية و أوروبية عالمية كان أبرزها تالجو الأسبانية و سيمنس الألمانية في النهاية استقرت مصر على عرض سيمنس لانه كان أفضل عرض فني و مالي بعد انتهاء الدراسات و اختيار شركات المقاولة وافقت البنوك الأوروبية انها تدخل تمول المشروع و بدأ بعدها فورًا تنفيذ المشروع
كدا العمود الفقري لمصر الجديدة بيتم تنفيذه ، الصحراء بتتشق بطريق عالمي و قطار سريع يتبقى المشروعات التنموية اللي هنجذب بيها المستثمر و المواطن الأول يحط فلوسه فيها و التاني يسكن و يشتغل و يخرج من الوادي
بدأت وزارة الاسكان تنفيذ سلسلة من المدن السكنية الجديدة كان أهمها سفنكس – غرب قنا – غرب أسيوط – ملوي الجديدة – الفشن الجديدة .
و المدن دي موجودة غرب النيل وأغلب المجتمعات السكنية موجودة شرق النيل فكان ضروري يبقى فيه كباري و جسور تعدي النيل و تقرب المسافة و تشجع الناس انها تسكن في المدن الجديدة و ميحسوش انهم بعدوا عن قراهم و مدنهم و أهاليهم فتم إطلاق المشروع القومي لمحاور النيل وده مشروع غرضه انشاء محور بيربط بين الشرق و الغرب كل ٢٥ كم بطول لا يقل عن ٢٠ كم عشان ميبقاش مجرد كوبري على النيل ده يكون محور تنمية كامل كان اهم محاور النيل : ديروط – سمالوط – قوص – كلابشة – الفشن – منفلوط – ابو تيج ..وغيرهم)
على ضفاف الطريق و القطار السريع بيتنفذ مشاريع تنموية ضخمة جدا زراعية و صناعية أهمها :
١-“صوب اللاهون”
١٦ الف فدان من الصوب الزراعية الحديثة بيستهدف المشروع زراعة الطماطم، الفلفل، الخيار، الكنتالوب، الباذنجان، البصل الأخضر، الكوسة، الكرنب الأحمر ، و الفراولة
٢-“العاصمة الزراعية الجديدة”
بمنطقة غرب غرب المنيا بيتم استصلاح و زراعة ٩٥٠ الف فدان بيتركز اغلب المساحة على زراعة العنب و المانجو و الجوافة و القشطة الهندية و الكوسة و القمح و اللاڤندر و عباد الشمس و الزيتون
٣-“الدلتا الجديدة”
أضخم مشروع زراعي في تاريخ مصر بيقوم على استصلاح و زراعة ٢.٨ مليون فدان بيعتمد على زراعة القمح ، الشعير ، الذرة الصفراء ، الجزر ، الفراولة ، الطماطم ، البصل ، الفول السوداني ، الفاصوليا البيضا ، البطاطس ، البسلة ، البطاطا ، بنجر السكر ، الليمون ، اليوسفي ، البرتقال
٤-“الوادي الجديد”
إعادة إحياء مشروع كلنا كنا نسمع عنه توشكى و شرق العوينات ، حجم الأعمال اللي اتنفذت في المشروع ده اخر ٣ سنين يوازي حجم اللي اتنفذ في اخر ٣٠ سنة الطرق اللي اتشقت و الترع اللي اتحفرت و محطات الكهرباء و شبكات الري و أعمال البنية التحتية اللي اتنفذت في الفترة الأخيرة قد اللى اتنفذ في عقود كاملة وده انعكس سريعًا على حجم الرقعة الزراعية
المشروع بيستهدف استصلاح و زراعة ١.١ الى ٢ مليون فدان بيتركز أغلب المساحة على زراعة القمح و الدرة الصفرا و القطن
٥-“مزارع التمور”
على مسار الممر بيتنفذ سلسلة مزارع للتمور الفاخرة بإجمالي ٢.٥ مليون نخلة بيمثلوا ١٦٪ من حجم النخيل اللي بتملكه مصر حاليًا منها أصناف اول مرة يتزرع في مصر وده بهدف وضع مصر على خريطة صادرات التمور الفاخرة زي : المجدول – البرحي – الصقعي – السيوي – السكري – خلاص – صفاوي – السيف – عجوة المدينة – العنبرة – الزهدي – الخضري – دقلة النور – خنيزي – المجهول – الهلالي – الونانة – زغلول – حسنية – ربيعة – مبروم – روتانا – برني العيص – مشروك – الفرض – اللولو – الرزيز – ابو معان – أمبيرا .
- الإعلانات -
٦-“الموانئ الجافة”
سلسلة موانىء جافة جاري تنفيذها على مسار ممر التنمية و الميناء الجاف هو محطات تداول للبضائع و السلع في الصحراء بهدف التخفيف عن الموانىء البحرية و تقليل زمن انتظار السفن على الأرصفة البحرية ببساطة السفينة هتنزل الحمولة و يتم تحميلها على القطار السريع و يتم توزيعها على الموانىء الجافة و من الموانىء الجافة يتم توزيعها على المدن
أول ميناء جاف تم افتتاحه بتكلفة ١.٧ مليار جنيه بمدينة ٦ أكتوبر و جاري تنفيذ موانىء جافة كمان على مسار الممر في السادات و برج العرب و الفيوم و بني سويف و سوهاج و قسطل و أرقين
٧-“المناطق الصناعية”
عدد من المناطق الصناعية بيتم انشاءها و تجهيزها و تأجيرها أو بيعها مُرخصة مش بيكلف المستثمر غير تركيب الماكينات في مصنعه فقط بتتنفذ على مسار الممر في الفيوم ، سوهاج ، قنا و أسوان بإجمالي ١٤٠٠ مصنع صغير و متوسط
٧-“مصنع القناة للسكر”
على الطريق بيتنفذ واحد من أكبر مصانع السكر في العالم على مساحة ٢٤٠ فدان و ملحق بيه مزرعة على مساحة ١٨١ الف فدان المصنع باستثمارات تبلغ مليار دولار يقدر ينتج سنويا مليون طن سكر أبيض وده بيمثل ٣٥٪ من حجم إنتاج جميع مصانع السكر في مصر
٨-“المليون راس ماشية”.
من ضمن المشروعات الاستثمارية الطموحة جدا مشروع مزارع الماشية اللي اغلبه بيتنفذ على مسار ممر التنمية المشروع بيهدف لاستيراد مليون بقرة حلّابة و تسمين من البرازيل و اسبانيا و المانيا و هولندا
المواشي اللي بيتم استيرادها بتكون محسنة وراثيًا بتوصل معدلات تسمينها من ٤٠٠ الى ٥٠٠ كجم وده ضعف معدلات تسمين الأبقار اللي عندنا حاليا واللي بيوصل متوسط معدلات تسمينها الى ٢٠٠ كجم
ملحق بالمزارع مجازر حديثة و معامل إنتاج البان متطورة
المشروع مبهر جدا
بس مبهر لمشروع هننفذه وقت اما اتعرض في التسعينات مش مبهر بطموح الدولة انهاردة في ٢٠٢٣ ممر التنمية ضروري يبقى له إحداثيات أكتر من كونه طريق و قطار و مدينة على ضفافه ده كنا محتاجينه من ٣٠ سنة احنا انهاردة عايزين ممر تنمية جديد بمفهوم يناسب تحديات الدولة المصرية عشان كدا عملنا للمشروع upgrade زودنا التحديات و كبرنا الأهداف
الطريق و القطار واصلين لآخر نقطة جنوب مصر ممكن نستغلهم في ايه ؟ ممكن الطريق يتمد للدول الأفريقية و يبقى عابر للدول ومن هنا تم إحياء مشروع طريق “القاهرة / كيب تاون” ممر التنمية هيكون شريان تنمية لمصر و افريقيا
الطريق هيمتد للدول الافريقية اللي معندهاش سواحل و شواطىء و معتمدة في حركة التجارة التصدير و الاستيراد على الطيران وده مكلف جدًا بالتالي تقدر الدول دي انها تصدر و تستورد من خلال مصر
الطريق الدولي الجديد ممتد خلال ١٠ دول افريقية بيبدا من مصر و يمر على السودان و اثيوبيا و كينيا وتنزانيا و زامبيا و موزمبيق و زيمبابوي لحد ما يوصل الى جنوب افريقيا بطول ١٠،٢٢٨ كم
الطريق و القطار هيكونوا حلقة وصل بين الدول الافريقية الحبيسة و بين الأسواق العالمية خاصة الأوروبية في حركة الاستيراد والتصدير من خلال موانىء مصر على البحر المتوسط و البحر الأحمر و عشان حركة التجارة الضخمة المنتظرة تحتاج موانىء على مستوى عالمي في الحجم و الإدارة أطلقت مصر مشروع ضخم لتطوير الموانىء المصرية باستثمارات ٢٠٠ مليار جنيه على رأسها ميناء الاسكندرية
–ميناء الاسكندرية بيتم توسعته عن طريق الردم داخل البحر لإضافة ساحات اضافية جديدة لتدوال الحاويات و المخطط انه يتم ضم ميناءي المكس و الدخيلة لميناء الإسكندرية و يكون “ميناء الإسكندرية الكبير GPA” بحيث انه يتم فتح الموانىء التلاتة “الدخيلة / المكس /اسكندرية” و يبقوا ميناء واحد
-على الجهة الشرقية من بحر اسكندرية الكراكات البلجيكية العملاقة “سبارتاكوس” بتردم داخل البحر لتنفيذ ميناء آخر عملاق “ميناء أبو قير الكبير GAQP” وده منتظر انه يكون أكبر ميناء موجود على سواحل البحر المتوسط
و الإعتماد مش هيكون على موانيء المتوسط بس كمان موانيء البحر الأحمر جاري توسعتها و تطويرها و ربطها مع المشروع من خلال محاور عرضية بتربط الطريق من قنا الى سفاجا و ده يختصر حوالي ٨٠٠ كيلو تقريبا على قوافل البضائع المنتظرة
وايضا ميناء العين السخنة انهاردة بيشهد أضخم حركة توسعة في تاريخه الميناء بيتوسع لأربع أضعاف حجمه ومنتظر انه يكون أكبر ميناء بيطل على البحر الأحمر بعد الانتهاء من توسعته
وكذلك ميناء سفاجا جاري توسعته و إنشاء محطة جديدة متعددة الأغراض بطاقة استيعاب ٢ مليون حاوية جديدة و المحطة القديمة بيتعمل لها رصيف جديد و ساحة انتظار و مخازن لوجيستية ده بخلاف إزالة مناطق سكنية عشوائية كاملة و ضم أراضيها للميناء و تغيير اسمه الى “ميناء سفاجا الكبير”
الموانىء بعد توسعتها و تطويرها هيتطبق فيها منظومة الشحن المسبق ACI وده نظام جمركي بيعتمد على إتاحة بيانات ومستندات الشحنة زي الفاتورة التجارية وبوليصة الشحن النهائية أو المبدئية قبل الشحن بـ ٤٨ ساعة على الأقل بهدف تسهيل اجراءت التجارة و تقليل فترة تواجد البضائع بالموانئ لمنع تكدسها .
ممر التنمية انطلق و مصر بدأت تغيير جغرافيتها بتعمير صحراء لم يجرأ احد انه يسكنها و يعمرها قبل هذا و بتمد تنميتها لاشقائها في افريقيا عشان تكون مصر مفتاح القارة و بوابة لتجارة تقدر بمئات المليارات سنويًا .
